علموا أولادكم
علم إبنك..
إنه لو معزوم عند حد مايروحش فاضي
وما يخدش معاه شخص غير مدعو
ويروح في ميعاده لا بدري ولا متاخر، ويلبس كويس وريحته تكون حلوة عشان يوصل للي قدامه انه بيحترمه ومقدره،
ومايدخلش البيت بالجزمة حتي ولو صاحب البيت طلب ده، وإنه يخبط وياخد جنب "يمينه او شماله" المهم مايقفش في وش الباب عشان مايجرحش اهل البيت وياكل الموجود من غير ما يطلب أصناف مش محطوطة حتي ولو مخلل
وياكل من غير صوت للمضغ، ويقفل بقه وهو بيمضغ، ومايختارش المكان اللي يقعد فيه، ولكن يقعد مطرح ماصاحب البيت يقعده لأن كل واحد أدري بخصوصياته، وياكل براحته عادي من غير كسوف،
ولو مش عاجبه حاجة في الاكل مايقولش وياكل من اللي عاجبه بس
وماينساش يشكر اللي عزمه ويدعيله بزيادة الخير، ويوصل السلام للام أو الزوجة اللي طبخت وإنه قد ايه أكلها جميل، ومايقومش يغسل ايده غير لو صاحب البيت أذنله
واما يغسل ايده يتأكد إنه نضف الحوض وراه وماسبش أي بواقي أكل، ويفرد الفوطة بعد ما ينشف بيها،
ويمشي موطي ومايبصش علي تفاصيل الشقة اللي دخلها، ولو معزوم مع حد وقام يغسل زيه مايقعدش مكان اللي قام لأن ده حق غيره
ولو دخل ولقي ناس بتتكلم في موضوع من الادب إنه مايغيرش فجأه الموضوع اللي بيتكلموا فيه، ولا يقطع كلام حد ويتكلم هو لأن ده بيقلل احترامه،
وإنه يستأذن قبل مايمشي، ولو صاحب البيت صمم يقعده يقعد ويجبر بخاطره
ولو هيخرج يعلي صوته وهو خارج عشان اهل البيت يستعدوا لخروجه، ويدعي لصاحب البيت وهو خارج بالبركة والسعة، ولو قابل الأم أو الزوجة ضروري يشكرها ويمدح في أكلها وكرمها.
والعزومة الجاية أكيد هتكون علي ابنك ،
علموا أولادكم اداب الزياره
دمتم في سعادة دائمة.
تعليقات
إرسال تعليق